Nape Nnauye amepongeza juhudi zilizofikiwa katika uwekaji wa nyasi bandi

Nape Nnauye amepongeza juhudi zilizofikiwa katika uwekaji wa nyasi bandi

WAZIRI wa Habari, Utamaduni, Sanaa na Michezo, Nape Nnauye amepongeza juhudi zilizofikiwa katika uwekaji wa nyasi bandia katika uwanja mkongwe wa Nyamagana mkoani hapa.

Akizungumza katika ukaguzi wa uwanja huo, Nape aliwaomba makandarasi wajitahidi sana katika ujenzi wa uwanja huo ili kuhakikisha kinakuwa bora zaidi Afrika Mashariki.

Nape alisema serikali itaendelea kusaidia katika ujenzi wa uwanja huo huku akiwaomba wadau mbalimbali kama benki na mifuko ya pensheni kusaidia katika uwekaji wa majukwaa na viti uwanjani.

"Nazipongeza halmashauri za Kagera na Mwanza kwa ujenzi wa viwanja vya Kaitaba na Nyamagana na naziomba manispaa na halmashauri nyingine ziige mfano huo kwa kujenga viwanja vingi vya michezo," amesema Nape.

Waziri Nape aliziomba timu za kimataifa zifike kucheza kwenye uwanja huo kwa ajili ya kuweka kambi mkoani hapa ili waweze kutumia.

Naibu Meya wa Mwanza, Bhiku Kotecha alisema anaipongeza sana serikali kwa juhudi za ujenzi wa kiwanja hicho na aliahidi kufuata magizo aliyopewa na Waziri Nape ili kuhakikisha wanakamilisha uwanja huo.

Kotecha alimuomba waziri afike siku ya uzinduzi wa uwanja huo pale utakapokuwa umekamilika.