Mwanamuziki wa Uganda Moses Ssekibogo, amefariki dunia

Mwanamuziki wa Uganda Moses Ssekibogo, anayefahamika zaidi kwa jina la Mowzey Radio wa kundi la Goodlyfe amefariki.

Bw Balaam Barugahara, ambaye ni promota, anasema kuwa Radio alifariki dunia Alhamisi majira ya saa kumi na mbili asubuhi.

Radio alifariki katika hospitali ya Case mjini Kampala ambako alikuwa amelazwa baada ya kuripotiwa kupigwa hadi kupoteza fahamu kwenye kilabu cha pombe cha De Bar, kilichopo katika mji wa Entebbe wiki iliyopita.

"Utawala wa hospitali ya Case wanasikitika kutangaza kifo cha Moses Ssekibogo alias Moze Radio leo tarehe 1 Februari 2018 saa kumi na mbili asubuhi," ilisoma sehemu ya taarifa iliyotolewa na Hospitali ya Case kuhusiana na kifo hicho.

"Nimeelezwa juu ya kifo cha mwanamuziki Moses Ssekibogo aka Mowzey Radio. Hivi karibuni nilitoa mchango wangu kwa ajili ya matibabu yake nikitumaini kwamba atapona. Alikuwa kijana mdogo mwenye kipaji mwenye maisha mazuri ya mbeleni," Alielezea Museveni katika ujumbe wa Twitter

Haki miliki ya pichaRADIO & WEASEL

Image captionMowzey Radio alikuwa anaimba pamoja na Weasel kama Radio & Weasel

Hii inakuja saa chache baada ya rais Museveni kuchangia Shilingi milioni 30m, pesa za Uganda kwa ajili ya matibabu yake.

''Wakati Mowzey Radio alipoingia kwenye uwanja wa Muziki, sekta ya muziki ilikua mahututi. Muziki wa wanamuziki wachache wa waliokuwa maarufu zaidi wakati huo ulikua umerudiwa rudiwa kupita kiasi na kuchosha .Ninyi wawili mlikuja kwenye sekta hii na kuiongezea uhai sekta ya muziki. Mlileta ushindanikwa miziki mizuri na uvaaji mpya ," Alituma ujumbe Liz Elder kwenye ukurasa wa Facebook.

Vipaji vya Radio vya Uimbaji pamoja na muziki vilianza kubainika wakati alipokuwa mwanafunzi katika shule ya sekondari, akiimba katika kwaya ya kanisa katoliki. Akiwa mwanafunzi wa sekondari pia aliweza kujizolea tunu mbali mbali za uimbaji katika ngazi ya wilaya na nyingine nyingi.

Radio alipendwa sana kwa utumbuizaji wake kwenye sherehe na tamasha mbali mbali za muziki na za kijamii kwa sauti yake thabiti na ya kuvutia.

Wiki iliyopita, polisi walisema kuwa waliwakamata watu watano kwa ajili ya kuisaidia katika uchunguzi wa polisi juu ya kisa cha kumpiga Radio.